¿E se o chatbot inventa as respostas? Como evitalo na túa web

Unha muller examina un libro cunha lupa xunto ao seu portátil

É probablemente o medo máis estendido cando se fala de poñer un chatbot con IA nunha web: que lle diga a un cliente un prezo que non é, un horario equivocado ou unha condición que non existe. E é un medo con fundamento, porque ás IA lles pasa. O que non todo o mundo sabe é que ten solución.

Por que unha IA inventa cousas

Os modelos de linguaxe, como os que hai detrás dos asistentes de IA, aprenderon a escribir textos que soan ben. Cando lles preguntas algo, xeran a resposta máis probable segundo todo o que leron. Se non teñen o dato, a miúdo non din «non o sei»: escriben algo plausible. A iso chámaselle alucinación, e é a razón pola que un asistente xeral pode dicirche con toda seguridade algo que é falso.

Se lle preguntas a unha IA xenérica canto custa unha limpeza dental na túa clínica, non ten forma de sabelo. Daráche un prezo que parece razoable, pero non é o teu.

Libros, unha libreta e unha lupa sobre unha mesa

A solución: que só poida responder coa túa información

A técnica que o resolve chámase recuperación aumentada, ou RAG polas súas siglas en inglés. A idea é sinxela: antes de escribir a resposta, o sistema busca na información do teu negocio os fragmentos que falan do que che preguntaron. Despois, a IA redacta a resposta usando só eses fragmentos.

Se busca e non atopa nada, a resposta correcta non é improvisar, senón recoñecer que non o sabe e ofrecer outra vía, como deixar un teléfono ou falar con alguén do equipo.

Que se poida comprobar

Hai un paso máis que marca a diferenza: que cada resposta diga de onde sae. Igual que un bo artigo cita as súas fontes, un bo asistente debería enlazar á páxina da túa web onde está o dato. Así o cliente pode comprobalo se quere, e ti podes revisar en calquera momento por que respondeu o que respondeu.

O que segue dependendo de ti

Ningún sistema pode responder ben con información mala. Se a túa web di que abres ás nove e en realidade abres ás dez, o asistente dirá as nove. Por iso é importante que a información estea ao día e que o asistente se actualice cando cambias a túa web. E por iso convén revisar de cando en vez o que pregunta a xente.

Como o fai OX·IA

En OX·IA o asistente está construído así desde o principio. Só responde co que hai na túa web e no que ti lle ensines; cada dato leva un número que enlaza á páxina exacta e resalta a frase da que sae. Se non atopa a resposta, dio con amabilidade, ofrece o teu contacto e apúntache a pregunta no panel para que lla ensines nun momento. Cada noite revisa a túa web e aprende o que cambiou, e se usas WordPress, co noso plugin apréndeo ao instante.

Se queres ver como responde coa túa propia web, fai a proba gratis e pregúntalle algo que saibas que non está. Esa é a mellor forma de comprobalo.

¿Prefires falar cunha persoa?

Chámanos e contámoscho, sen compromiso.